ఏరువాక పౌర్ణమి సందర్భంగా ట్రాక్టర్ నడిపిన ఎమ్మెల్యే విడుదల రజిని
గుంటూరు జిల్లా: రైతులే ఈ దేశానికి ఆస్తి అని చిలకలూరిపేట శాసనసభ్యురాలు విడదల రజిని తెలిపారు. మండల కేంద్రం నాదెండ్లలో శుక్రవారం వ్యవసాయశాఖ ఆధ్వర్యంలో ఏరువాకపౌర్ణమి సంబరాలు నిర్వహించారు. కార్యక్రమానికి చిలకలూరిపేట శాసనభ్యురాలు విడదల రజిని ముఖ్య అతిథిగా హాజరయ్యారు. ఈ సందర్భంగా ఎమ్మెల్యే మాట్లాడుతూ అన్నదాతలు ఆనందంగా ఉంటే సమాజం సురక్షితంగా ఉన్నట్లేనని తెలిపారు. తమ ప్రభుత్వం అధికారంలోకి వచ్చాక ఏడాది వ్యవధిలోనే ఊరూరా రైతు భరోసా కేంద్రాలను తీసుకొచ్చామని చెప్పారు. అన్నదాతకు ఏది కావాలన్నా.. ఏ అవసరం వచ్చినా రైతు భరోసా కేంద్రాల్లో సంప్రదిస్తే సరిపోతుందని తెలిపారు. 50కిపైగా వ్యవసాయ సంబంధ సేవలను రైతు భరోసా కేంద్రాలు అన్నదాతలకు అందజేస్తాయని చెప్పారు. అన్ని పంటలను ప్రభుత్వమే ఈ ఏడాది కొనుగోలు చేసిందని, భవిష్యత్తులోనూ గిట్టుబాటు ధరలు అందసేస్తూ ప్రభుత్వం పంటలు కొంటుందని చెప్పారు. ధరల స్థిరీకరణ నిధిని ఇందుకు వినియోగిస్తున్నామని తెలిపారు. రైతులకు వడ్డీ లేని రుణాలను నిజాయితీగా అందిస్తున్న ప్రభుత్వం దేశంలోనే తమదేనని స్పష్టంచేశారు. భవిష్యత్తులో జనతా బజార్లు ఊరారా రాబోతున్నాయని, ఇవి అందుబాటులోకి వచ్చాక రైతులు పండించే పంటలకు అద్భుతమైన ధరలు వస్తాయని చెప్పారు. గతేడాది జగనన్న పాలనలో వర్షాలు సంమృద్ధిగా కురిశాయని, పంటలకు ధరలు కూడా బాగా దక్కాయని రైతులు సంతోషంతో ఉన్నారని చెప్పారు. వైఎస్సార్ కాంగ్రెస్పార్టీ హయాంలో అన్నదాతలంతా ఆనందంగా ఉంటారని తెలిపారు. తమది రైతు ప్రభుత్వమని తాను గర్వంగా చెబుతున్నానన్నారు.
నాదెండ్లలో ఆనందోత్సాహాల నడుమ ఏరువాక పౌర్ణమి వేడుకలు జరిగాయి. ఎమ్మెల్యే స్వయంగా అరకదున్ని దుక్కి తోలారు. ట్రాక్టర్ నడిపి కార్యర్తలను ఉత్సాహపరిచారు. గోమాతకు పూజలు చేశారు. తొలుత వినాయకుడి ఆలయంలో ప్రత్యేక పూజలు నిర్వహించారు. కొబ్బరికాయ కొట్టి ఏరువాక ప్రారంభించారు. వ్యవసాయశాఖ అసిస్టెంట్ డైరెక్టర్ మస్తానమ్మ, నాదెండ్ల, యడ్లపాడు, చిలకలూరిపేట మండలాల వ్యవసాయశాఖ అధికారులు ఏఆర్ ప్రసాద్, సరిత, శ్రీలత, నాదెండ్ల మండల తహశీల్దార్ సాంబశివరావు, ఎంపీడీవో మోషే, ఆయా విభాగాల అధికారులు, వైఎస్సార్ కాంగ్రెస్ పార్టీ మండల అధ్యక్షుడు జి.శ్రీనివాసరెడ్డి, జెడ్పీటీసీ అభ్యర్థి కాట్రగడ్డ మస్తాన్రావు, ఆయా గ్రామాల నాయకులు, కార్యకర్తలు పాల్గొన్నారు.
